aabidamaan
பெப்ரவரி மாதம் வாகன இறக்குமதி ஆரம்பித்ததும் வாகனங்களின் விலை அதிகரிக்குமெனவும், அதன் பின்னர் படிப்படியாக அது குறைவடையுமெனவும் ஜனாதிபதி அநுரகுமார திஸாநாயக்க தெரிவித்துள்ளார். 2018 ஆம் ஆண்டு வாகன இறக்குமதி செய்யப்படும் போது 190 ரூபாவாக காணப்பட்ட டொலரின் பெறுமதி தற்போது 300 ரூபாவாக காணப்படுகிறது. அதன் காரணமாக 40 சதவீத அதிகரிப்பு வாகன விலையில் ஏற்படுமென மேலும் அவர் கூறியுள்ளார்.
வாகன இறக்குமதியின் பின்னர் புதிய வாகனங்களுக்கும், பழைய வாகனங்களுக்குமான விலை வித்தியாசம் குழப்பத்தை ஏற்படுத்தும் நிலையை உருவாக்கும். அதன் காரணமாக வாகன விலைகளை குறிப்பிட்ட அளவுக்கு அதிகரித்து வைத்திருக்க வேண்டிய நிலை ஏற்பட்டுள்ளது என ஜனாதிபதி கூறியுள்ளார். வங்கிகள், கடன் வழங்குனம் நிறுவனங்கள் வட்டிவீதங்கள் என்ற காரணிகள் இரண்டாம் பாவனை வாகனங்களுக்கு காணப்படுவதாகவும், அவை சீர் செய்யப்பட்ட பின்னர் வாகனங்களின் விலை படிப்பபடியாக குறைவடையுமென மேலும் ஜனாதிபதி கூறியுள்ளார்.
இதுவரை சுமார் 20,000 வாகன அனுமதிகள் வழங்கப்பட்டுள்ளன, ஆனால் அந்த அனுமதி வைத்திருப்பவர்களுக்கு தற்போது இடமளிக்கப்படாது. இந்த அனுமதி வைத்திருப்பவர்களுக்கான மாற்று ஏற்பாடுகள் குறித்து அரசாங்கம் தற்போது அவர்களோடு பேசி வருகிறது எனவும் ஜனாதிபதி தெரிவித்துள்ளார். “பெப்ரவரி 1 முதல் 1.2 பில்லியன் அமெரிக்க டொலர் மதிப்புள்ள வாகனங்களை இறக்குமதி செய்ய அரசாங்கம் திட்டமிட்டுள்ளது, ஆண்டு முழுவதும் இறக்குமதி தொடரும். இருப்பினும், பெப்ரவரி மாதத்தில் அனைத்து வாகன இறக்குமதிகளுக்கும் ஒரே நேரத்தில் சந்தையைத் திறக்க அரசாங்கம் விரும்பவில்லை எனவும் அநுர நேற்று நடைபெற்ற தொலைக்காட்சி நிகழ்ச்சி ஒன்றில் தெரிவித்துள்ளார்.
