aabidamaan
இன்று மத்திய, சப்ரகமுவ மற்றும் ஊவா மாகாணங்களின் பல இடங்களிலும், மேலும் காலி மற்றும் மாத்தறை மாவட்டங்களிலும் பிற்பகல் ஒரு மணிக்கு பின் மழை அல்லது இடியுடன் கூடிய மழை பெய்யக்கூடும் என்று சிரேஸ்ட வானிலை அதிகாரி கலாநிதி மொஹமட் சாலிஹீன் தெரிவித்துள்ளார்.
வடக்கு மற்றும் கிழக்கு மாகாணங்களில் காலை வேளையில் சிறிய அளவில் மழை பெய்யக்கூடிய சாத்தியக்கூறுகளும் காணப்படுகின்றன.
மேலும், மத்திய, சப்ரகமுவ மற்றும் மேல் மாகாணங்களின் சில பகுதிகளிலும் , காலி மற்றும் மாத்தறை மாவட்டங்களிலும் காலை வேளையில் பனிமூட்டம் காணப்படும்.
மின்னல் தாக்கங்கள் மற்றும் பலத்த காற்று ஏற்பட்டால், பொதுமக்கள் அவதானத்துடன் செயற்படுமாறு கேட்டுக்கொள்ளப்படுகின்றனர்.
காங்கேசன்துறை முதல் திருகோணமலை, ஹம்பாந்தோட்டை வழியாக காலி வரையிலான கடல் பிராந்தியங்களில் சில இடங்களில் மழை அல்லது இடியுடன் கூடிய மழை பெய்யக்கூடும்.
கடல் பிராந்தியங்களில் மணித்தியாலத்திற்கு 20 – 30 கிமீ வேகத்தில் புத்தளம் முதல் காங்கேசன்துறை, திருகோணமலை வழியாக ஹம்பாந்தோட்டை வரையிலான பகுதியில் வடகிழக்குத் திசையிலிருந்து காற்று வீசக்கூடும். நாட்டை சுற்றியுள்ள மற்ற கடல் பகுதிகளில் வடமேற்குத் திசையில் அல்லது மாறுபட்ட திசையிலிருந்து காற்று வீசும்.
புத்தளம் முதல் காங்கேசன்துறை வழியாக திருகோணமலை வரை, கடல் பிராந்தியங்களில் மணித்தியாலத்திற்கு 40 – 45 கிமீ வேகத்தில் இடைக்கிடையே காற்று அதிகரித்து வீசக் கூடும், இவ்விடங்களில் கடல் கொந்தளிப்பாகவும் காணப்படும்.
பொதுவாக நாட்டைச் சூழவுள்ள கடல் பிராந்தியங்கள் மிதமான அலையுடன் காணப்படும். ஆனால் இடியுடன் கூடிய மழை பெய்யும் வேளையில் பலத்த காற்று வீசுவதுடன், அவ்வேளையில் கடல் பகுதிகள் தற்காலிகமாக மிகவும் கொந்தளிப்பான நிலையில் காணப்படும் என்றும் கூறியுள்ளார்.
