aabidamaan
தமிழகத்தில் மக்களின் நன்மதிப்பை பெறுவதற்காக அரசியலில் களமிறங்கி இருக்கும் முன்னணி நட்சத்திர நடிகரான விஜய் நடிப்பில் தயாராகி வரும் ‘விஜய் 69 ‘எனும் திரைப்படத்திற்கு ‘ ஜன நாயகன்’ என பெயரிடப்பட்டு, அதற்கான இரண்டு போஸ்டர்கள் வெளியிடப்பட்டிருக்கிறது.
முன்னணி நட்சத்திர இயக்குநரான ஹெச். வினோத் இயக்கத்தில் உருவாகி வரும் ‘ ஜன நாயகன் ‘ எனும் திரைப்படத்தில் விஜய், பூஜா ஹெக்டே, பாபி தியோல், கௌதம் வாசுதேவ் மேனன், பிரகாஷ் ராஜ் , நரேன் , பிரியாமணி, மமீதா பைஜூ, மோனிஷா பிளெஸ்சி , வரலட்சுமி சரத்குமார், டீ ஜே அருணாச்சலம் உள்ளிட்ட பலர் நடித்து வருகிறார்கள்.
சத்யன் சூரியன் ஒளிப்பதிவு செய்து வரும் இந்த திரைப்படத்திற்கு அனிருத் இசையமைக்கிறார். விவசாயம்- விவசாயி – அது சார்ந்த அரசியல் பின்னணியில் பொலிடிகல் எக்சன் என்டர்டெய்னராக தயாராகி வரும் இந்த திரைப்படத்தை கே வி என் புரொடக்ஷன்ஸ் நிறுவனம் பிரம்மாண்டமான பொருட் செலவில் தயாரித்து வருகிறது.
இப்படத்தின் படப்பிடிப்பு தொடர்ச்சியாக நடைபெற்று வருகிறது. இந்நிலையில் இந்திய குடியரசு தினத்தை கொண்டாடும் வகையில் படக்குழுவினர் படத்தின் டைட்டில் மற்றும் ஃபர்ஸ்ட் லுக்கை வெளியிட்டுள்ளனர்.
இதில் விஜயின் புகழ் பெற்ற ‘செல்ஃபி ‘ புகைப்படத்தின் பின்னணியில் ஒரு போஸ்டரும் , ‘நான் ஆணையிட்டால்’ என்ற வாசகத்துடன் கையில் சாட்டையை சுழற்றியபடி ஒரு போஸ்டரும் படக் குழுவினர் வெளியிட்டுள்ளனர்.
இந்த இரண்டு போஸ்டர்களுக்கும் விஜய் ரசிகர்கள் மட்டுமின்றி அரசியல் வட்டாரத்திலும், பொது மக்களிடத்திலும் பெரும் வரவேற்பையும், கவனத்தையும் பெற்று வருகிறது.
